Eze 29 | NdeIBE | STEP | Ngomnyaka wetshumi, ngenyanga yetshumi ngosuku lwetshumi lambili, ilizwi likaJehova lafika kimi lisithi:

Ezekiel 29

Isiphrofetho ngokumelana leGibhithe

1 Ngomnyaka wetshumi, ngenyanga yetshumi ngosuku lwetshumi lambili, ilizwi likaJehova lafika kimi lisithi: 2 “Ndodana yomuntu, khangelisa ubuso bakho kuFaro inkosi yaseGibhithe uphrofethe okubi ngaye langelizwe lonke laseGibhithe. 3 Khuluma laye uthi: ‘Nanku okutshiwo nguJehova Wobukhosi: “ ‘Ngimelane lawe, Faro nkosi yaseGibhithe, wena silo esikhulu esilele phakathi kwezifula zaso. Uthi, “INayili ngeyami; ngazenzela yona.”

4 Kodwa ngizafaka iwuka emihlathini yakho nginamathisele izinhlanzi zezifula zakho, emaxolweni akho. Ngizakukhuphela ngaphandle kwezifula zakho, lezinhlanzi zonke zinamathele emaxolweni akho.

5 Ngizakutshiya enkangala, wena kanye lezinhlanzi zonke zasezifuleni zakho. Uzawela egcekeni egangeni njalo ungabuthwa loba udojwe. Ngizakunikela njengokudla ezinyamazaneni zomhlaba lezinyoni zasemoyeni.

6 Lapho-ke bonke abahlala eGibhithe bazakwazi ukuthi mina nginguJehova. “ ‘Ube uludondolo lomhlanga lwendlu ka-Israyeli. 7 Kwathi bekubamba ngezandla zabo, wacezuka waqhaqha amahlombe abo; kwathi lapho beseyama kuwe wephuka lamaqolo abo aqhuzuka.

8 “ ‘Ngakho-ke nanku okutshiwo nguJehova Wobukhosi: Ngizaletha inkemba imelane lawe ngibulale abantu bakho kanye lezifuyo zabo.

9 IGibhithe izakuba yinkangala echithekileyo. Lapho-ke bazakwazi ukuthi mina nginguJehova. “ ‘Ngokuba wathi, “INayili ngeyami; yimi engayenzayo,” 10 ngakho ngimelana lawe kanye lezifula zakho, njalo ngizakwenza ilizwe laseGibhithe libe lunxiwa logwadule oluphundlekileyo kusukela eMigidoli kusiya e-Aswani, kuze kuyefika emngceleni weKhushi.

11 Akulanyawo lomuntu loba olwenyamazana oluzadabula phakathi kwalo; akulamuntu ozahlala khona okweminyaka engamatshumi amane. 12 Ngizakwenza ilizwe laseGibhithe libe ngeliphundlekileyo phakathi kwamazwe achithekileyo, njalo amadolobho alo azaphundleka okweminyaka engamatshumi amane phakathi kwamadolobho angamanxiwa. AmaGibhithe ngizawachithela phakathi kwezizwe ngiwahlakazele emazweni.

13 “ ‘Kodwa nanku okutshiwo nguJehova Wobukhosi: Ekupheleni kweminyaka engamatshumi amane ngizaqoqa amaGibhithe ezizweni ayehlakazelwe kuzo. 14 Ngizawabuyisela evela ekuthunjweni ngiwabuyisele eGibhithe yangaPhezulu, ilizwe labokhokho babo. Lapho bazakuba ngumbuso omncane. 15 Uzakuba ngumbuso omncane kakhulu emibusweni njalo kawuyikuziphakamisela phezulu kwezinye izizwe futhi. Ngizawenza ungabi lamandla ukuze ungabusi izizwe futhi. 16 IGibhithe kaliyikuba ngumthombo wethemba futhi wabantu bako-Israyeli kodwa lizakuba yisikhumbuzo sesono sabo sokuyafuna usizo kulo. Lapho-ke bazakwazi ukuthi mina nginguJehova Wobukhosi.’ ”

17 Ngomnyaka wamatshumi amabili lesikhombisa, ngenyanga yakuqala ngelanga lakuqala, ilizwi likaJehova lafika kimi lisithi:

18 “Ndodana yomuntu, uNebhukhadinezari inkosi yaseBhabhiloni waqhuba ibutho lakhe ukuyakulwa impi enzima leThire; amakhanda wonke aphuculwa aphuceka lamahlombe wonke aba buhlungu. Ikanti yena lebutho lakhe kabatholanga mvuzo empini ayikhokhela ekuhlaseleni iThire.

19 Ngakho nanku okutshiwo nguJehova Wobukhosi: IGibhithe ngizalinikela kuNebhukhadinezari inkosi yaseBhabhiloni, njalo uzathumba inotho yalo. Uzaliphundla aliphange ilizwe njengeholo lebutho lakhe.

20 Ngimnike iGibhithe njengomvuzo wemizamo yakhe ngokuba yena lebutho lakhe lokho bakwenzela mina, kutsho uJehova Wobukhosi.

21 “Ngalolosuku ngizakwenza uphondo lukhulele indlu ka-Israyeli, njalo ngizavula umlomo wakho phakathi kwabo. Lapho-ke bazakwazi ukuthi mina nginguJehova.”